الخميس، 3 فبراير 2011

استمرواااا



هو زعلان انكم مش بتحبوه، لانه هو كمان مش بيحبنا، وما يهموش اننا نحبه، ولا عمره في حياته عمل اي مجهود عشان يكسب حبنا، بس هزيتوه عشان هزمتوا اللي كانوا داعمين له وكان حاطط كل رهانه عليهم: الامريكان
الاول قالوا ده نظام ثابت وقشطة ومش حيحصل له حاجة
بعدين قالوا: طيب ما يحاول يعمل اصلاحات، لسه قدامه فرصة
بعدين الوسخة كلينتون قالت: انا مش عارفة اعمل ايه؟ الراجل ده "امضى ثلاثة عقود يخدم مصالح الولايات المتحدة الامريكية في المنطقة" لكن شعبه مش عايزه وبيقمع التظاهرات
بعدين قالوا: طب بصوا.. الشعب هو اللي يحدد هو عايز ايه
اخر حاجة، مبارك قالهم استنوني بس.. انا حاظبطهم، طلع قال الخطاب العجيب الغريب المريب بتاعه ده، اللي شتم فيه الشعب وهزأنا، وقال لنا يا مخربين يا سلابين يا نهابين، وبالمناسبة بقى انا اصلا كده كده مش ناوي اترشح مش عشان انتوا مش عايزيني، عشان انا اساسا قرفان منكم، وكان ناقص يختم الخطاب بانه يتف على الشعب
فالناس اتجننت زيادة
قام اوباما قالك ما بدهاش، ما اراهنش انا على حصان خسران هو انا ايه؟ متجوزه؟ لو مراتي كنت طلقته، يالا يا عم شوف نفسك
حتى اسرائيل قالت: يا خساااااارة، مبارك كده بخ، يالا.. والله كان راجل كويس.. هييييييه ما دايم الا وجه الله
ده اللي جننه وخلاه يهبل الهبل ده، اوباما كلمه في التليفون وقال له: بالسلامة يا شربات، شوف لك سكة بقى ما تستنانيش على الغدا انا حاتغدى برة
هو ده هو ده هو ده.. هو ده اللي خلاه يشد في البقية الباقية من شعره ويقول: موتوا لي الشعب ده
خلاص، خلاص اثبتوا بقى
أصعب ساعة في الحرب هي آخر ساعة، احنا دلوقت مافيش قدامنا غير:
الله اكبررررررررررررررررررررررر
إلى كل من توجه إلى ميدان التحرير في المظاهرة المليونية: حنروح بكرة، حنروح بكرة ان شاء الله في مجموعات وحندخل، الليلة دي اسود ليلة مرت على مبارك، اسود ليلة في حياته من ساعة ما ربنا خلقه، وما تخافوش، العيال مأمنين المكان
قابضين على عناصر الشرطة اللي كانت لابسة مدني والاسكندرانية اجدع ناس حياخدوهم دروع بشرية، على الله حد يرمي تفة بقى، حتيجي في وش عناصر الشرطة اللي نزلت تضرب المتظاهرين
وده نداء الى كل المتظاهرين في كل المحافظات: بخ بالنوسبة لحكاية التسليم للجيش دي.. ما عدناش نسلم الجيش حد، السجين ده بتاعي، ولو شفتوه في المعركة كتفوه واعملوه درع بشري اسيركم وحقكم تحشوه تخللوه تعلقوه في النجفة زي ما تحبوا
ان شاااااااء الله، بكرة اخر يوم يا رب يا رب يا رب، بس نشد حيلنا ونثبت
وزي كل مرة، حنعمل اييييه؟ ايييييوة، حنقول يا رب
حنقول يرب، وبنقول يا رب، وقلنا يا رب
يا رب.. وربنا حيسمع، وحيستجيب، عشان احنا عملنا وقلنا يا رب، مش حيسمعنا ابدا واحنا قاعدين في بيوتنا، حيسمعنا دايما واحنا نازلين وبنعمل وبنضحي
ومصر تستاهل
وانتوا تستاهلوا
والمصريين الحلوين، المهذبين، الراقيين، العظماء، المحترمين، النبها، الواعيي، اللي اثبتوا فعلا فعلا فعلا انهم شعب حضارة يستاهلوا التضحية عشانهم
نستاهل عيشة احسن من كده، وربنا حيدينا عيشة احسن من كده، ومصر الحلوة الجميلة العظيمة المحروسة البهية تستاهل حال احسن من كده، وربنا حيرزقها من وسع بدم ولادها الابرار
يا شعب مصر... ياللي عشتوا عمركوا كله تتكلموا عن سمعة مصر: صبرتوا ونلتوا يا ولاد.... مصر بقت سمعتها في السما بيكم
كللللللللللل الناس، كلللللللل الناس، العدو قبل الحبيب، احنوا جباههم لكم اكبارا واحتراما يا شعب مصر
كلللللللللللللل الاحباب، كللللللللللللللللل الاحباب، مش بس من المحيط الى الخليج، ده انا بتجيلي رسائل من البوسنة، تصدقوا؟ البوسنة، كلهم بيصلوا ويدعوا لكم
التليفونات تبيجي من اول العراق لحد المغرب بيعيطوا ويدعوا لكم، ميتين مليون بيدعوا لكم
كل عربي قلبه بيرفرف عليكم وهاين عليه ييجي يموت عشانكم لو يقدر

نوارة نجم
...............................
شكرا لكل من سأل عنى

هناك 6 تعليقات:

  1. طب اقولك ايه ، ينصر دينك يا نوراة
    و ينصر شعبنا .. كل كلمة مكتوبة بحرقة دم
    اللهم ولي من يصلح و اصلح لنا لمة يا نوارة
    انا بعيد مقيمة في الخليج لكن معاكي و معاكم كلكم

    بكياني كله

    عارفة يا نوارة انا بعد خطاب الريس كنت من الناس اللي بكت و بشدة لاني شعرت انه مسن و مريض و سرطان و فقد حفيده و خلاص اعلن انه لا توريث و ماشي
    لكن بعدها شفت صور التعذيب في السجون للنساء و السيدات
    بعد ما شفت الكهراب
    قلت اشمعنى نحافظ له على كراممته و يمشى مرفوع الراس و هو مخلي ناس كتير في شعبه منكسي الرويس و فقرؤ و فساد
    يمكن انا ما بقدرش اشتم لكن فعلا ناقمة
    كان نفسي يكون كويس يا نوارة
    كان نفسي يحترم ادمياتنا
    كان نفسي ياخد ما باقولش لا
    لكن يسب حاجة للشعب يعيشوا بكرامة
    اعذري الناس اللي نتسكة به
    انت عارفة احنا شعب انهزامي
    عارفة انا كتبت كرة النص ده




    إنهزامية

    إنهزامية محبوبتي
    تحترف المجون
    تعشق في ثورة
    تكره في سكون
    إنهزامية

    إنهزامية محبوبتي .. لا تحنث قسم السكينة
    تتوارى خلف الظل
    شاردة مستكينة
    أغاضبها لأعوام
    تنطرني باكية حزينة
    أهادنها .. في ثوان
    تبدي إبتسامة مجهدة أليمة
    إنهزامبة ..

    إنهزامية محبوبتي .. مشكلة عضال
    أخدعها ، أظلمها، أهزمها
    تمجد فن الإنكسار
    أهجرها.. أزجرها .. أعصرها
    أهدد بالإنفصال
    تتوسل .. تستجدي.. تستعطف ..
    ثم .. تعاود الإتصال!

    إنهزامية

    إنهزامية محبوبتي .. سليلة قيود و سجون
    لا تهاجم ، لا تدافع
    عشقها .. عزف لا يثير الشجون
    لا تشاكس .. لا تجاهر
    تفتقر لحلو سكاكر الجنون

    إنهزامية

    إنهزامية محبوبتي .. كطالبة نظامية
    ما ضرها لو تعشق بإرتجالية؟
    بمكر أنثوي
    بمرح شبابي
    بعفوية طفولية
    لكنها أبداً .. إنهزامية

    إنهزامية محبوبتي .. ذات ملامح رمادية
    لا شيطانية هي و لا هي ملائكية
    تعفو .. و ينقصها العفوية
    ترضى .. ليتها ثورية
    عابسة .. أتكون يوماً عبثية ؟
    حورية هي أم تراها أدمية ؟
    لست أدري .. لكنها يقيناً
    إنهزامية

    إنهزامية محبوبتي .. كسيف الهزيمة.. بلا حد
    كأميرة عربية
    وردية الخد
    وثيرة اليد
    ممشوقة القد
    لكن.. ليت لها في الأخذ و الرد
    إنهزامية

    إنهزامية محبوبتي .. شبه مستحيلة
    ثرية أصيلة .. لكن لا سلطان لها و لا حيلة
    سكرها زائد .. يفسد طعم النرجيلة
    أقصيها أدنيها .. أستخدم كل وسيلة
    فتدعوني أتخذها.. سيان حليلة أو خليلة
    كونها .. إنهزامية

    إنهزامية محبوبتي .. أيلولية الأقدار
    أداعبها بالعصا .. أسايسها بالنار
    تمطرني بالقبل
    تهديني أكاليل الغار
    أطؤها بقدمي .. أشد الوثاق
    أسيل دماً .. أضيق الخناق
    تضعني على عرشها
    تمعن في العناق
    تبكي .. تصرخ
    لا أطيق فراق
    إنهزامية.. بلهاء حلوة المذاق

    إنهزامية محبوبتي .. سريالية الحضور
    شرقية الملامح
    غربية العطور
    منوعة الهيئة
    كخلطة عود
    مجهولة الجذور
    إنهزامية

    إنهزامية محبوبتي .. تناصر بن العم و تخاصم الشقيق
    لا هي بالليل تنام و لا هي بالصبح تفيق
    نهاراً ترتدي ما لا يعيق
    و ليلا تضع ما لا يليق
    تتشح يوماً بالعباءة
    و دهراً تتلون بالمساحيق
    تارة تقسم بالتوراة
    و أخرى .. بالبيت العتيق

    إنهزامية
    كجدتي و ابنتي
    و خالتي و عمتي
    و أسرتي و ضيعتي
    و بلدتي و أمتي
    إنهزامية

    إنهزامية محبوبتي .. صالحة لكل العصور
    تطير في كل فضاء .. تسبح في شتى البحور
    مكبلة أمواجها .. ناعسة لا تثور
    كسجينة مسكينة منسية
    سفنها تشرع من إيلات لتصب في طبرية
    شريعتها تسمح لإنسي أن يتغشى جنية
    إنهزامية

    إنهزامية محبوبتي .. غير سوية
    أبية .. و ترضى بالدونية
    بطلة.. تلعب أدوار ثانوية
    طبيبة.. و تعامل جسدها بعشوائية
    حرة.. لكن سيان لديها زواج شرعي
    أو بورقة عرفية
    إنهزامية

    إنهزامية محبوبتي ..
    صبرها أشد مني كاظمية
    ليلها أطول مني ساهرية
    فجرها لم يشرق منذ غروب الأيوبية
    رحمها إتسع لتلقيحات صناعية
    إنهزامية

    إنهزامية محبوبتي .. صامدة، ليتها صدامية
    آثامها شارونية
    توبتها غامدية
    تصافح أبناؤها بمشاعر عدم الإنحياز
    و مع الأغيار .. حاتمية هي بإمتياز
    إنهزامية

    إنهزامية محبوبتي .. مزاجية هي أم مستنيرة؟
    تارة تدعو عربي لطاولة مستديرة
    و تارة تراقص يهودي في حانة فقيرة
    و تارات.. لا تدعى للوليمة الكبيرة

    و تظل إنهزامية
    و تظل محبوبتي
    حتى تتوافاني المنية

    اتعودنا يا نوارة على الدونية
    و على اننا نعامل الريس كوالد
    فهناك من يشعرنا اننا شعب عاق
    عايز يحجر على والده
    طب و الله في ناس كتير بتتعاطى في عذا الشان على هذا النحو
    و في ناس تقولك الي تعرفه احسن من اللي ما تعرفوش
    و الله انا شفت ست عجوزة تقولهم
    عمل ايه الريس عشان شوية العيال دول يقلوا ادبهم عليه
    افتحوا عليهم جنينة الحيوانات هيهربوا زي الكلاب
    و سماح انور بيتقولك
    احرقوهم .. يولوعوا
    سمعتيها دي على اليوتيوب
    حسبي الله و نعم الوكيب

    ردحذف
  2. عذراَ كان يجب اْن تاْخذ الحكمه من اْسم مدونتك
    وتذكر كلام النبى علية الصلاة والسلام
    اْتقى الله ولو بشق تمره
    وتذكر لا اْحد يعلم اْين الخير متنساش موضوعى الجديد
    اخوك
    محمود المصرى

    ردحذف
  3. مصر

    فووووووووق الجميع

    ردحذف
  4. يارب يكتب لمصر الامان والاستقرار
    الف تحيه لشخصك

    ردحذف
  5. لكل من يبحث عن عمل ويريد التخلص من مشكلة البطالة .. إليك الحل السحري
    خدمة التوظيف المجانية تتيح وظائف خالية لكل التخصصات بجميع الدول العربية
    سارع بتسجيل سيرتك الذاتية للحصول على وظيفة - العرض لفترة محدودة
    ▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬▼▬
    وظائف في مصر ▬◘▬ وظائف في الإمارات ▬◘▬ وظائف في السعودية ▬◘▬ وظائف في تونس
    وظائف في قطر ▬◘▬ وظائف في ليبيا ▬◘▬ وظائف في الأردن ▬◘▬ وظائف في العراق
    وظائف في اليمن ▬◘▬ وظائف في عمان ▬◘▬ وظائف في لبنان ▬◘▬ وظائف في الجزائر
    وظائف في البحرين ▬◘▬ وظائف في الكويت ▬◘▬ وظائف في المغرب ▬◘▬ وظائف في سوريا
    ▬◘▬ وظائف في فلسطين ▬◘▬ وظائف في السودان ▬◘▬
    ▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬▲▬

    ردحذف